Tischsegen

Allmächtig got herr Jhesu Christ

was leipnar du uns gebend bist,

dy sey gesegent und berait

von dir mit aller sälikhait

das uns darinn berür chain we

das well got benedicite.

Dy drivald in dem höchsten tron

lob wir mit kyrieleyson

got vater in dem hymelreich

beschirm uns hy und ewikleich

durch deinen heiligen namen

vor allem übel Amen.

Her hais das es gesegent sey

got wont uns und dem essen bey

amen und auch bey dem getrank

das yglich mensch got also dank

das er sich über uns erbarm

got sei gelobt sprecht reich und arm.

Dankch sagen wir dir herre got

um all dy speis dy uns ist not

und loben dich mit reichem schall

umb dy und ander guettat all

wann du lebst got in himmelreich

und reichest immer und ewikleich.

Gots nam gesegnet sey an end

sein hilf uns alles laid erwend

got loner aller guten sach

nu gib yn hy und dort gemach

mit ganczen freuden ymmer mer

von den dy speis ist kommen her.

Der Mönch von Salzburg 1

1 Ehlert, Trude: Das Kochbuch des Mittelalters, München 1993, S. 32